快遞小哥舉動暖心世界大不同-tft每日頭條

養生書浪講老年人早浪醒了覅急了起床，要醒醒睏。巧了，手機鈴聲響，一個年輕小夥子講伊是送快遞嗰。聽說我還呒沒起床就講包裹放辣門口覅忘記。

“好嗰，謝謝侬！”

自從學會網購，我空下來就歡喜上網淘寶，各種好白相物事，吃嗰用嗰行情行市，賽過逛廟會，就算不買，瞄瞄也開心。前兩日我下了一單雲南菌子湯料。我去雲南支過教，現在從山民手裡網購點土特産也算盡一份愛心，所以盡管價钿勿便宜，我也爽氣“支付寶”。

快遞小哥舉動暖心世界大不同（上海閑話快遞小哥）1

按雲南賣家個講法，山高路遠，菌子可能要十天半個月到，我講勿急。搿歇隻過了一個禮拜，雲南菌子就來啦？起床，快手快腳到門口，看到一隻大塑料袋，四四方方，鼓鼓囊囊，捏上去軟綿綿，不像是菌子。拿到窗口亮個地方一看，包裹浪向有“順豐速運”貨單，上頭寫“被子”。邊浪還有二維碼以及“寄付現結”四個字。咦，啥意思？屋裡向被頭交關，我肯定呒沒買過新被頭。

覅是網浪向騙子又出新花頭！搿些騙子惡形怪狀，有趟子電話裡冒充老朋友問我借鈔票，我當然呒沒睬伊。假使我搿歇用手機掃二維碼，勿曉得阿會上騙子個當……

哪能辦？想了想還是撥剛剛來電話個手機。對面迅速回我電話，末腳關照我勿要拆包裝，等伊晏歇回單位查清爽。

中浪向接到小夥子電話：“阿姨，侬阿是某某中學個老師？搿被頭是退管會個禮物，侬放一百個心，收下來好了！”哎，原來是搿能介！聽得我一陣感動。謝謝！

我打電話撥退管會個張老師表示感謝，張老師客氣講自家工作呒沒做好，我講是我自家開會辰光開小差了。半個月前，學堂退休教工“回娘家”活動，會浪肯定提到過嗰。

乃末我放心打開塑料袋，細膩個新疆棉花被香噴噴嗰！

下半日四點鐘做夜飯，門鈴響了。開門接過快遞，正是雲南菌子。快遞員小夥子熱情地講早浪向個棉包裹就是伊幫我送來嗰。

“太感謝侬啦，做事體真仔細！哪能稱呼侬啊？”我開心問伊。

“叫我小茅就好了！茅台酒個‘茅’。”

“好啊，忒謝謝侬了，小茅！”

冬天來了，暖心個事也到了！（許德華）